dainyāṣṭakam

October 17, 2025 Friday

śrīkr̥ṣṇa gōkulādhīśa nandagōpatanūdbhava |
yaśōdāgarbhasambhūta mayi dīnē kr̥pāṁ kuru || 1 ||

vrajānanda vrajāvāsa vrajastrīhr̥dayasthita |
vrajalīlākr̥tē nityaṁ mayi dīnē kr̥pāṁ kuru || 2 ||

śrībhāgavatabhāvārtharasātman rasikātmaka |
nāmalīlāvilāsārthaṁ mayi dīnē kr̥pāṁ kuru || 3 ||

yaśōdāhr̥dayānanda vihitāṅgaṇariṅgaṇa |
alakāvr̥tavaktrābja mayi dīnē kr̥pāṁ kuru || 4 ||

virahārtivratasthātman guṇagānaśrutipriya |
mahādainyadayōdbhūta mayi dīnē kr̥pāṁ kuru || 5 ||

atyāsaktajanāsakta parōkṣabhajanapriya |
paramānandasandōha mayi dīnē kr̥pāṁ kuru || 6 ||

nirōdhaśuddhahr̥dayadayitāgītamōhita |
ātyantikaviyōgātman mayi dīnē kr̥pāṁ kuru || 7 ||

svācāryahr̥dayasthāyilīlāśatayuta prabhō |
sarvathā śaraṇaṁ yātē mayi dīnē kr̥pāṁ kuru || 8 ||

iti śrīharidāsa viracitaṁ dainyāṣṭakam ||