garbha stutiḥ (dēva kr̥tam)

October 17, 2025 Friday

dēvā ūcuḥ |
jagadyōnirayōnistvamanantō:’vyaya ēva ca |
jyōtiḥ svarūpō hyanaghaḥ saguṇō nirguṇō mahān || 1 ||

bhaktānurōdhāt sākārō nirākārō niraṅkuśaḥ |
nirvyūhō nikhilādhārō niḥśaṅkō nirupadravaḥ || 2 ||

nirupādhiśca nirliptō nirīhō nidhanāntakaḥ |
svātmārāmaḥ pūrṇakāmō nimiṣō nitya ēva ca || 3 ||

svēcchāmayaḥ sarvahētuḥ sarvaḥ sarvaguṇāśrayaḥ |
sukhadō duḥkhadō durgō durjanāntaka ēva ca || 4 ||

subhagō durbhagō vāgmī durārādhyō duratyayaḥ |
vēdahētuśca vēdaśca vēdāṅgō vēdavidvibhuḥ || 5 ||

ityēvamuktvā dēvāśca praṇēmuśca muhurmuhuḥ |
harṣāśrulōcanāḥ sarvē vavr̥ṣuḥ kusumāni ca || 6 ||

dvicatvāriṁśannāmāni prātarutthāya yaḥ paṭhēt |
dr̥ḍhāṁ bhaktiṁ harērdāsyaṁ labhatē vāñchitaṁ phalam || 7 ||

ityēvaṁ stavanaṁ kr̥tvā dēvāstē svālayaṁ yayuḥ |
babhūva jalavr̥ṣṭiśca niścēṣṭā mathurāpurī || 8 ||

iti śrībrahmavaivartē mahāpurāṇē śrīkr̥ṣṇajanmakhaṇḍē saptamō:’dhyāyē dēvakr̥ta garbhastutiḥ |