śrī bālakr̥ṣṇāṣṭakam 2

October 17, 2025 Friday

śrīmannandayaśōdāhr̥dayasthitabhāvatatparō bhagavān |
putrīkr̥tanijarūpaḥ sa jayati purataḥ kr̥pālurbālakr̥ṣṇaḥ || 1 ||

kathamapi riṅgaṇamakarōdaṅgaṇagatajānugharṣaṇōdyuktaḥ |
kaṭitaṭakiṅkiṇijālasvanaśaṅkitamānasaḥ sadā hyāstē || 2 ||

vikasitapaṅkajanayanaḥ prakaṭitaharṣaḥ sadaiva dhūsarāṅgaḥ |
parigacchati kaṭibhaṅgaprasarīkr̥tapāṇiyugmābhyām || 3 ||

upalakṣitadadhibhāṇḍaḥ sphuritabrahmāṇḍavigrahō bhuṅktē |
muṣṭīkr̥tanavanītaḥ paramapunītō mugdhabhāvātmā || 4 ||

namrīkr̥tavidhuvadanaḥ prakaṭīkr̥tacauryagōpanāyāsaḥ |
svāmbōtsaṅgavilāsaḥ kṣudhitaḥ samprati dr̥śyatē stanārthī || 5 ||

siṁhanakhākr̥tibhūṣaṇabhūṣitahr̥dayaḥ suśōbhatē nityam |
kuṇḍalamaṇḍitagaṇḍaḥ sāñjananayanō nirañjanaḥ śētē || 6 ||

kāryāsaktayaśōdāgr̥hakarmāvarōdhakaḥ sadāstē |
tasyāḥ svāntaniviṣṭapraṇayaprabhājanō yatō:’yam || 7 ||

itthaṁ vrajapatitaruṇī namanīyaṁ brahmarudrādyaiḥ |
kamanīyaṁ nijasūnuṁ lālayati sma pratyahaṁ prītyā || 8 ||

śrīmadvallabhakr̥payā viśadīkr̥tamētadaṣṭakaṁ paṭhēdyaḥ |
tasya dayānidhikr̥ṣṇō bhaktiḥ prēmaikalakṣaṇā śīghram || 9 ||

iti śrīkr̥ṣṇadāsa kr̥taṁ śrī bālakr̥ṣṇāṣṭakam |