śrī giridhāryaṣṭakam

October 17, 2025 Friday

tryailōkyalakṣmīmadabhr̥tsurēśvarō
yadā ghanairantakarairvavarṣaha |
tadā:’karōdyaḥ svabalēna rakṣaṇaṁ
taṁ gōpabālaṁ giridhāriṇaṁ bhajē || 1 ||

yaḥ pāyayantīmadhiruhya pūtanāṁ
stanyaṁ papau prāṇaparāyaṇaḥ śiśuḥ |
jaghāna vātāyitadaityapuṅgavaṁ
taṁ gōpabālaṁ giridhāriṇaṁ bhajē || 2 ||

nandavrajaṁ yaḥ svarucēndirālayaṁ
cakrē digīśān divi mōhavr̥ddhayē |
gōgōpagōpījanasarvasaukhyakr̥t
taṁ gōpabālaṁ giridhāriṇaṁ bhajē || 3 ||

yaṁ kāmadōgdhrī gaganāhr̥tairjalaiḥ
svajñātirājyē muditābhyaṣiñcata |
gōvindanāmōtsavakr̥dvrajaukasāṁ
taṁ gōpabālaṁ giridhāriṇaṁ bhajē || 4 ||

yasyānanābjaṁ vrajasundarījanā
dinakṣayē lōcanaṣaṭpadairmudā |
pibantyadhīrā virahāturā bhr̥śaṁ
taṁ gōpabālaṁ giridhāriṇaṁ bhajē || 5 ||

br̥ndāvanē nirjarabr̥ndavanditē
gāścārayanyaḥ kalavēṇuniḥsvanaḥ |
gōpāṅganācittavimōhamanmatha-
-staṁ gōpabālaṁ giridhāriṇaṁ bhajē || 6 ||

yaḥ svātmalīlārasaditsayā satā-
-māviśyakārā:’gnikumāravigraham |
śrīvallabhādhvānusr̥taikapālaka-
-staṁ gōpabālaṁ giridhāriṇaṁ bhajē || 7 ||

gōpēndrasūnōrgiridhāriṇō:’ṣṭakaṁ
paṭhēdidaṁ yastadananyamānasaḥ |
sa mucyatē duḥkhamahārṇavādbhr̥śaṁ
prāpnōti dāsyaṁ giridhāriṇō dhruvam || 8 ||

praṇamya samprārthayatē tavāgrata-
-stvadaṅghrirēṇuṁ raghunāthanāmakaḥ |
śrīviṭhṭhalānugrahalabdhasanmati-
-statpūrayaitasya manōrathārṇavam || 9 ||

iti śrīraghunāthaprabhu kr̥ta śrī giridhāryaṣṭakam ||