śrī gōvardhanāṣṭakam

October 17, 2025 Friday

guṇātītaṁ parambrahma vyāpakaṁ bhūdharēśvaram |
gōkulānandadātāraṁ vandē gōvardhanaṁ girim || 1 ||

gōlōkādhipatiṁ kr̥ṣṇa vigrahaṁ paramēśvaram |
catuṣpadārthadaṁ nityaṁ vandē gōvardhanaṁ girim || 2 ||

nānājanmakr̥taṁ pāpaṁ dahēt tūlaṁ hutāśanaḥ |
kr̥ṣṇabhaktipradaṁ śaśvadvandē gōvardhanaṁ girim || 3 ||

sadānandaṁ sadāvandyaṁ sadā sarvārthasādhanam |
sākṣiṇaṁ sakalādhāraṁ vandē gōvardhanaṁ girim || 4 ||

surūpaṁ svastikāsīnaṁ sunāsāgraṁ kr̥tēkṣaṇam |
dhyāyantaṁ kr̥ṣṇa kr̥ṣṇēti vandē gōvardhanaṁ girim || 5 ||

viśvarūpaṁ prajādhīśaṁ vallavīvallabhapriyam |
vihvalapriyamātmānaṁ vandē gōvardhanaṁ girim || 6 ||

ānandakr̥tsurāśīśakr̥tasambhārabhōjanam |
mahēndramadahantāraṁ vandē gōvardhanaṁ girim || 7 ||

kr̥ṣṇalīlārasāviṣṭaṁ kr̥ṣṇātmānaṁ kr̥pākaram |
kr̥ṣṇānandapradaṁ sākṣādvandē gōvardhanaṁ girim || 8 ||

gōvardhanāṣṭakamidaṁ yaḥ paṭhēdbhaktisamyutaḥ |
tannētragōcarō yāti kr̥ṣṇō gōvardhanēśvaraḥ || 9 ||

idaṁ śrīmadghanaśyāmanandanasya mahātmanaḥ |
jñāninō jñānirāmasya kr̥tirvijayatētarām || 10 ||

iti śrī gōvardhanāṣṭakam ||