śrī gōvardhanadharāṣṭakam

October 17, 2025 Friday

gōpanārī mukhāmbhōjabhāskaraṁ vēṇuvādyakam |
rādhikārasabhōktāraṁ gōvardhanadharaṁ bhajē || 1 ||

ābhīranagarīprāṇapriyaṁ satyaparākramam |
svabhr̥tyabhayabhēttāraṁ gōvardhanadharaṁ bhajē || 2 ||

vrajastrī viprayōgāgni nivārakamaharniśam |
mahāmarakataśyāmaṁ gōvardhanadharaṁ bhajē || 3 ||

navakañjanibhākṣaṁ ca gōpījanamanōharam |
vanamālādharaṁ śaśvadgōvardhanadharaṁ bhajē || 4 ||

bhaktavāñchākalpavr̥kṣaṁ navanītapayōmukham |
yaśōdāmātr̥sānandaṁ gōvardhanadharaṁ bhajē || 5 ||

ananyakr̥tahr̥dbhāvapūrakaṁ pītavāsasam |
rāsamaṇḍalamadhyasthaṁ gōvardhanadharaṁ bhajē || 6 ||

dhvajavajrādisaccihna rājaccaraṇapaṅkajam |
śr̥ṅgārarasamarmajñaṁ gōvardhanadharaṁ bhajē || 7 ||

puruhūtamahāvr̥ṣṭīrnāśakaṁ gōgaṇāvr̥tam |
bhaktanētracakōrēnduṁ gōvardhanadharaṁ bhajē || 8 ||

gōvardhanadharāṣṭakamidaṁ yaḥ prapaṭhēt sudhīḥ |
sarvadā:’nanyabhāvēna sa kr̥ṣṇō ratimāpnuyāt || 9 ||

racitaṁ bhaktilābhāya dhārakānāṁ sanātanam |
muktidaṁ sarvajantūnāṁ gōvardhanadharāṣṭakam || 10 ||

iti śrīgōkulacandra kr̥taṁ gōvardhanadharāṣṭakam ||