śrī kālī prātaḥ smaraṇa stōtram

October 16, 2025 Thursday

prātaḥ smarāmi madirāruṇapūrṇanētrāṁ
kālīṁ karālavadanāṁ kamanīyamātrām |
udyannitānatagatāṁ vigatāṁ svasaṁsthān
dhātrīṁ samasta jagatāṁ karuṇārdracittām || 1 ||

prātarbhajāmi bhujagābharaṇāmaparṇāṁ
śrīdakṣiṇāṁ lalitavālalatāṁ saparṇām |
kāruṇyapūrṇanayanāṁ nagarājakanyāṁ
dhanyāṁ varā:’bhayakarāṁ paramārtihantrīm || 2 ||

prātarnamāmi nagarājakulōdbhavāṁ tāṁ
kāntāṁ śivasya karavālakapālahastām |
trailōkyapālanaparāṁ praṇavādimātrāṁ
nāgēndrahārakalitāṁ lalitāṁ trinētrām || 3 ||

ślōkatrayamimaṁ puṇyaṁ prātaḥ prātaḥ paṭhēnnaraḥ |
tamōbuddhiṁ samuttīrya sapaśyēt kālikāpadam || 4 ||

iti śrī kālī prātaḥ smaraṇa stōtram |