śrī kr̥ṣṇa śaraṇāṣṭakam – 3

October 17, 2025 Friday

dvidalīkr̥tadr̥ksvāsyaḥ pannagīkr̥tapannagaḥ |
kr̥śīkr̥takr̥śānuśca śrīkr̥ṣṇaḥ śaraṇaṁ mama || 1 ||

phalīkr̥taphalārthī ca kutsitīkr̥takauravaḥ |
nirvātīkr̥tavātāriḥ śrīkr̥ṣṇaḥ śaraṇaṁ mama || 2 ||

kr̥tārthīkr̥takuntījaḥ prapūtīkr̥tapūtanaḥ |
kalaṅkīkr̥takaṁsādiḥ śrīkr̥ṣṇaḥ śaraṇaṁ mama || 3 ||

sukhīkr̥tasudāmā ca śaṅkarīkr̥taśaṅkaraḥ |
sitīkr̥tasarinnāthaḥ śrīkr̥ṣṇaḥ śaraṇaṁ mama || 4 ||

chalīkr̥tabalidyauryō nidhanīkr̥tadhēnukaḥ |
kandarpīkr̥takubjādiḥ śrīkr̥ṣṇa śaraṇaṁ mama || 5 ||

mahēndrīkr̥tamāhēyaḥ śithilīkr̥tamaithilaḥ |
ānandīkr̥tanandādyaḥ śrīkr̥ṣṇaḥ śaraṇaṁ mama || 6 ||

varākīkr̥tarākēśō vipakṣīkr̥tarākṣasaḥ |
santōṣīkr̥tasadbhaktaḥ śrīkr̥ṣṇaḥ śaraṇaṁ mama || 7 ||

jarīkr̥tajarāsandhaḥ kamalīkr̥takārmukaḥ |
prabhraṣṭīkr̥tabhīṣmādiḥ śrīkr̥ṣṇaḥ śaraṇaṁ mama || 8 ||

śrīkr̥ṣṇaḥ śaraṇaṁ mamāṣṭakamidaṁ prōtthāya yaḥ sampaṭhēt
sa śrīgōkulanāyakasya padavīṁ samyāti bhūmītalē |
paśyatyēva nirantaraṁ taraṇijātīrasthakēliṁ prabhōḥ
samprāpnōti tadīyatāṁ pratidinaṁ gōpīśatairāvr̥tām || 9 ||

iti śrīraghunāthaprabhu kr̥taṁ śrī kr̥ṣṇa śaraṇāṣṭakam ||