śrī kr̥ṣṇa stavarājaḥ – 2 (kr̥ṣṇadāsa kr̥tam)

October 17, 2025 Friday

anantakandarpakalāvilāsaṁ
kiśōracandraṁ rasikēndraśēkharam |
śyāmaṁ mahāsundaratānidhānaṁ
śrīkr̥ṣṇacandraṁ śaraṇaṁ gatō:’smi || 1 ||

anantavidyuddyuticārupītaṁ
kauśēyasaṁvītanitambabimbam |
anantamēghacchavidivyamūrtiṁ
śrīkr̥ṣṇacandraṁ śaraṇaṁ gatō:’smi || 2 ||

mahēndracāpacchavipicchacūḍhaṁ
kastūrikācitrakaśōbhimālam |
mandādarōdghūrṇaviśālanētraṁ
śrīkr̥ṣṇacandraṁ śaraṇaṁ gatō:’smi || 3 ||

bhrājiṣṇugallaṁ makarāṅkitēna
vicitraratnōjjvalakuṇḍalēna |
kōṭīndulāvaṇyamukhāravindaṁ
śrīkr̥ṣṇacandraṁ śaraṇaṁ gatō:’smi || 4 ||

vr̥ndāṭavīmañjulakuñjavādyaṁ
śrīrādhayā sārthamudārakēlim |
ānandapuñjaṁ lalitādidr̥śyaṁ
śrīkr̥ṣṇacandraṁ śaraṇaṁ gatō:’smi || 5 ||

mahārhakēyūrakakaṅkaṇaśrī-
-graivēyahārāvalimudrikābhiḥ |
vibhūṣitaṁ kiṅkiṇinūpurābhyāṁ
śrīkr̥ṣṇacandraṁ śaraṇaṁ gatō:’smi || 6 ||

vicitraratnōjjvaladivyavāsā-
-pragītarāmāguṇarūpalīlam |
muhurmuhuḥ prōditarōmaharṣaṁ
śrīkr̥ṣṇacandraṁ śaraṇaṁ gatō:’smi || 7 ||

śrīrādhikēyādharasēvanēna
mādyantamuccai ratikēlilōlam |
smarōnmadāndhaṁ rasikēndramauliṁ
śrīkr̥ṣṇacandraṁ śaraṇaṁ gatō:’smi || 8 ||

aṅkē nidhāya praṇayēna rādhāṁ
muhurmuhuścumbitatanmukhēndum |
vicitravēṣaiḥ kr̥tatadvibhūṣaṇaṁ
śrīkr̥ṣṇacandraṁ śaraṇaṁ gatō:’smi || 9 ||

iti śrīkr̥ṣṇadāsa kr̥ta śrī kr̥ṣṇa stavarājaḥ |