śrī kr̥ṣṇa stōtram (brahma kr̥tam)

October 17, 2025 Friday

rakṣa rakṣa harē māṁ ca nimagnaṁ kāmasāgarē |
duṣkīrtijalapūrṇē ca duṣpārē bahusaṅkaṭē || 1 ||

bhaktivismr̥tibījē ca vipatsōpānadustarē |
atīva nirmalajñānacakṣuḥ pracchannakāraṇē || 2 ||

janmōrmisaṅghasahitē yōṣinnakraughasaṅkulē |
ratisrōtaḥ samāyuktē gambhīrē ghōra ēva ca || 3 ||

prathamāmr̥tarūpē ca pariṇāmaviṣālayē |
yamālayapravēśāya muktidvārātivistr̥tē || 4 ||

buddhyā taraṇyā vijñānairuddharāsmānataḥ svayam |
svayaṁ ca tvaṁ karṇadhāraḥ prasīda madhusūdana || 5 ||

madvidhāḥ katicinnātha niyōjyā bhavakarmaṇi |
santi viśvēśa vidhayō hē viśvēśvara mādhava || 6 ||

na karmakṣētramēvēdaṁ brahmalōkō:’yamīpsitaḥ |
tathāpi na spr̥hā kāmē tvadbhaktivyavadhāyakē || 7 ||

hē nātha karuṇāsindhō dīnabandhō kr̥pāṁ kuru |
tvaṁ mahēśa mahājñātā duḥsvapnaṁ māṁ na darśaya || 8 ||

ityuktvā jagatāṁ dhātā virarāma sanātanaḥ |
dhyāyaṁ dhyāyaṁ matpadābjaṁ śaśvatsasmāra māmiti || 9 ||

brahmaṇā ca kr̥taṁ stōtraṁ bhaktiyuktaśca yaḥ paṭhēt |
sa caivākarṇya viṣayē na nimagnō bhavēddhruvam || 10 ||

mama māyāṁ vinirjitya sujñānaṁ labhatē dhruvam |
iha lōkē bhaktiyuktō madbhaktapravarō bhavēt || 11 ||

iti śrībrahmavaivartē mahāpurāṇē śrīkr̥ṣṇajanmakhaṇḍē dvātriṁśōdhyāyē brahmakr̥ta śrī kr̥ṣṇa stōtram |