śrī pārvatī pañcakam – 2

October 16, 2025 Thursday

vinōdamōdamōditā dayōdayōjjvalāntarā
niśumbhaśumbhadambhadāraṇē sudāruṇā:’ruṇā |
akhaṇḍagaṇḍadaṇḍamuṇḍamaṇḍalīvimaṇḍitā
pracaṇḍacaṇḍaraśmiraśmirāśiśōbhitā śivā || 1 ||

amandanandinandinī dharādharēndranandinī
pratīrṇaśīrṇatāriṇī sadāryakāryakāriṇī |
tadandhakāntakāntakapriyēśakāntakāntakā
murārikāmacārikāmamāridhāriṇī śivā || 2 ||

aśēṣavēṣaśūnyadēśabhartr̥kēśaśōbhitā
gaṇēśadēvatēśaśēṣanirnimēṣavīkṣitā |
jitasvaśiñjitā:’likuñjapuñjamañjuguñjitā
samastamastakasthitā nirastakāmakastavā || 3 ||

sasambhramaṁ bhramaṁ bhramaṁ bhramanti mūḍhamānavā
mudā budhāḥ sudhāṁ vihāya dhāvamānamānasāḥ |
adhīnadīnahīnavārihīnamīnajīvanā
dadātu śampradā:’niśaṁ vaśaṁvadārthamāśiṣam || 4 ||

vilōlalōcanāñcitōcitaiścitā sadā guṇai-
-rapāsyadāsyamēvamāsyahāsyalāsyakāriṇī |
nirāśrayā:’:’śrayāśrayēśvarī sadā varīyasī
karōtu śaṁ śivā:’niśaṁ hi śaṅkarāṅkaśōbhinī || 5 ||

iti śrīmacchaṅkarācārya viracitaṁ śrī pārvatī pañcakam |